Баъди он ки режими саҳюнистӣ ба таври ғайримустақим таҳдид намуд, дар сурати сар задани ҷанг миёни Миср ва Исроил, садди муҳимми Мисро ҳадаф қарор медиҳад, як вакили мисрӣ бо вокуниши сахт посух дод.

Мустафо Бакрӣ, таҳлилгар ва намояндаи парлумони Миср бо ирсоли паёми шадид таъкид кард, ки агар Исроил чунин иқдом анҷом диҳад, мардуми Миср рӯзи дигар ба Тел-Авив хоҳанд расид.

“Шумо артиши Мисрро хуб намешиносед. Ба неруҳои худ нигоҳ кунед ва бубинед, ки ҷангҷӯёни Ҳамос ва муборизони Фаластин бо онҳо чӣ карданд”- гуфт Мустафо Бакрӣ.

Қаблан, як расонаи низомии Исроил иддао карда буд, ки Исроил метавонад Садди Аъло дар Асвонро бо мушакҳо дар лаҳзаи аввали ҳамла ба Миср ҳадаф қарор диҳад.

Ин расона навиштааст, ки мушакҳо ё аслиҳаи пешрафтаи дигар метавонанд садро вайрон карда, обхезии бузурге ба вуҷуд оваранд, ки шаҳрҳои Луксор ва Асвонро фаро мегирад ва об ба пойгоҳҳои низомӣ ва иншооти саноатӣ дар канори рӯдхонаи Нил мерасад.

Дар идомаи гузориш омадааст, ки агар ин ҳодиса рух диҳад, обхезӣ ба Қоҳира мерасад ва зиндагӣ дар ин шаҳрро фалаҷ мекунад. Дар натиҷаи чунин ҳодиса 1,7 миллион нафар кушта шуда ва агар огоҳии пешакӣ дода нашавад, шумори қурбониён метавонад ба 10 миллион нафар расад.

Дар пайи таҳдидҳои Исроил мақомоти низомии Миср ҳушдор додаанд, ки ҳама гуна таҷовузи низомӣ ба хоки Миср бо посухи шадид рӯ ба рӯ хоҳад шуд.

Дар ҳоли ҳозир Миср неруҳои низомии худро дар минтақаи Санои ҳаммарз бо Исроил ҷойгир кардааст ва онҳо комилан дар ҳолати омодабош қарор доранд.

Dialog.tj