Вазири корҳои хориҷии Русия Сергей Лавров дар мулоқот бо вазири корҳои хориҷии Тоҷикистон Сироҷиддин Муҳриддин дар шаҳри Санкт-Петербург нигаронии худро оид ба ноамнӣ дар Афғонистон ва кишварҳои ҳамсоя баён кард.

Сергей Лавров зимни мулоқот бо Сироҷиддин Муҳриддин, вазири корҳои хориҷии Тоҷикистон аз вазъи шиддатёбандаи амниятӣ дар Афғонистон изҳори нигаронӣ намуд. Вай таъкид кард, ки ноамнӣ дар Афғонистон метавонад ба кишварҳои ҳамсоя, бахусус Русия ва Тоҷикистон таъсири ҷиддӣ расонад.

“Маълум аст, ки вазъият дар ин кишвар ҳамоно душвор боқӣ монда, ба ҳамсоягонаш, аз ҷумла кишварҳои Осиёи Марказӣ ва махсусан Тоҷикистон таъсир мерасонад” – гуфт Сергей Лавров.

Вазири корҳои хориҷии Федератсияи Русия, инчунин, бар зарурати ҳамкориҳои минбаъда дар чаҳорчӯби созмонҳои бисёрҷониба барои таъмини амнияти минтақавӣ таъкид кард. Ӯ гуфт, ки Маскав ва Душанбе ҳамкориҳоро ҷиҳати беҳтарсозии самараноки Пойгоҳи низомии 201-и Русия дар Тоҷикистон идома медиҳанд. Ин пойгоҳ яке аз бузургтарин пойгоҳҳои низомии Русия дар хориҷи кишвар аст.

Нигаронии Сергей Лавров дар хусуси ноаманӣ дар Афғонистон дар ҳолест, ки дар рӯзҳои ахир ҳамлаҳои интиҳорӣ дар ин кишвар афзоиш ёфтааст. Яке аз ҳамлаҳои интиҳории ахир рӯзи панҷшанбе дар Вазорати шаҳрсозии гурӯҳи террористии Толибон дар шаҳри Кобул сурат гирифт, ки дар натиҷа Арсало Хуротӣ, муовини молиявӣ ва маъмурӣ Вазорат захмӣ шуд.

Қаблан, як таркиши дигар дар вилояти Қундуз рух дода буд. Як нафар дар назди “Кобул бонк” дар ин шаҳр худро тарконид. Масъулияти ҳамларо гурӯҳи террористии ДОИШ бар уҳда гирифт.

Василий Небензя, намояндаи Русия дар Созмони Милали Муттаҳид рӯзи 11-уми феврал дар нишасти Шурои амнияти СММ гуфт, фаъолшавии гурӯҳи ДОИШ-и Хуросон дар Афғонистон тасодуфӣ нест.

Dialog.tj