Гардиши савдои хориҷии Ҷумҳурии Тоҷикистон дар соли 2024 ба 8,9 миллиард доллари Иёлоти Муттаҳидаи Амрико расид, ки нисбат ба соли гузашта 572,7 миллион доллар бештар мебошад. Дар ин хусус, дар нишасти матбуотӣ Хуршед Каримзода, раиси Хадамоти гумруки назди Ҳукумати Ҷумҳурии Тоҷикистон хабар дод.

Раиси Хадамоти гумруки Ҷумҳурии Тоҷикистон Хуршед Каримзода таъкид кард, ки ҳаҷми воридот аз 6,977 миллиард доллар гузашт. Ин дар ҳолест, ки содирот 1,923 миллиард долларро ташкил додааст.

Самтҳои асосии содироти Тоҷикистон дар соли 2024 ба кишварҳои Чин, Нидерландия, Туркия, Эрон, Афғонистон ва Покистон будааст.

Таъкид шуд, ки дар сохтори содирот чунин маҳсулот афзалият доштанд: маъдан ва консертратрҳо – 24, 3%, алюминийи хом – 9, 5%, нахи пахта -8,8% неруи барқ- 4,7% ва меваю сабзаҷот -2, 5%.

Бар асоси ҳибосоти Хадамоти гумрук маҳсулоти асосии воридотӣ ба Тоҷикистон дар соли 2024 инҳо буданд: маҳсулоти нафтӣ - 829 миллион доллар, автомобилҳои сабукрав – 521 миллион доллар, гандум – 274 миллион доллар, гази моеъ - 251 миллион доллар, чӯб - 207 миллион доллар ва телфонҳои мобилӣ - 157 миллион доллар.

Қисми зиёди маҳсулоти воридотии Тоҷикистонро шакар, орд, гӯшти мурғ, равғани растанӣ, глинозем ва нуриҳои менералӣ ташкил додаанд.

Хадамоти гумруки Ҷумҳурии Тоҷикистон таъкид кард, ки сабаби асосии афзоиши гардиши савдои Тоҷикистон содироту воридот ва инчунин, густариши савдои байналмилалии Тоҷикистон мебошад.

Dialog.tj