Тиҷорат миёни Тоҷикистон ва Русия дар муқоиса ба соли 2023 6% афзоиш ёфтааст. Ин нуктаро сафири фавқулода ва мухтори Федератсияи Русия дар Ҷумҳурии Тоҷикистон Семён Григорев дар суҳбат бо хабарнигори расонаи русии “ТАСС” иброз намудааст. Ба гуфти ӯ мақомоти ду кишвар дар оянда, яъне то соли 2030 ба нақша гирифтаанд, ки ин нишондиҳандаро боз 2,5 маротиба зиёд кунанд.

Сафири Федератсияи Русия дар Тоҷикистон Семён Григорев таъкид кардааст, ки Тоҷикистон яке аз муҳимтарин шарикони иқтисодӣ-тиҷоратии Русия дар минтақаи Осиёи Марказӣ ба ҳисоб рафта, дар содироту воридоти Русия нақши муҳим дорад.

Семён Григорев афзуда, ки барномаи рушди ҳамкориҳо миёни ду кишвар соҳаҳои тиҷорат, саноат, кишоварзӣ, нақлиёт ва логистикаро дар бар мегирад. Ӯ илова намудааст, ки аз ҷониби Русия ҳамчунин, ба рушди бахши сӯзишворию энергетика ва иқтисодиёти рақамӣ таваҷҷуҳи махсус зоҳир мегардад.

Сафири Федератсияи Русия дар Тоҷикистон Семён Григорев дар охири суҳбаташ бо хабарнигор хотирнишон шудааст, ки шарикии стратегӣ миёни Тоҷикистон ва Русия барои рушди устувори тиҷорати дуҷониба ва татбиқи лоиҳаҳои муҳимми стратегӣ аҳамияти хоса дорад.

Dialog.tj