Тавре Сафорати Шоҳигарии Арабистони Саудӣ дар Тоҷикистон хабар медиҳад, субҳи имрӯз ҳайати баландпояи Фонди Саудии Рушд бо роҳбарии Муҳаммад Ал-Масъуд бо сафари расмӣ ба шаҳри Душанбе ташриф овардаанд. Ҳадафи сафари мазкур баррасии раванди ҳамкорӣ ва тақдими қарзи имтиёзнок аз ҷониби Фонди Саудии Рушди Шоҳигарии Арабистони Саудӣ ба Вазорати молияи Ҷумҳурии Тоҷикистон барои сохтмони “Роҳи ҳалқавии Кӯлоб” гуфта мешавад.

“Роҳи ҳалқавии Кӯлоб” 14,5 километр дарозӣ дорад, ки мувофиқи нақша бояд дар асоси стандарти байналмилалии сохтмони роҳ сохта шавад. Роҳи мазкур дар шоҳроҳи байналмилалии Тоҷикистон - Ҷумҳурии халқии Чин ҷойгир аст ва бинобар ин, дар рушди логистикаи минтақавӣ нақши муассирро иҷро карда, дар ин масир ҳаракати нақлиётро беҳтар менамояд.

Дар доираи лоиҳа сохтмони ду шоҳроҳ, ду пул, истгоҳи боркашии нақлиёти вазнин ва техникаи роҳсозӣ дар назар аст.

Бояд гуфт, Фонди Саудии Рушд дар Тоҷикистон то имрӯз лоиҳаҳои бузургеро ба маблағи умумии 325 миллион доллар амалӣ намудааст ва роҳандозии тарҳи сохтмони “Роҳи ҳалқавии Кӯлоб” 14-ум лоиҳаи бузурги ин кишвар ба ҳисоб меравад.

Dialog.tj