Вазири тандурустии Ҷумҳурии Тоҷикистон Ҷамолиддин Абдуллозода дар нишасти хабарӣ гуфт, ки дар соли 2024 дар Тоҷикистон 115 муассисаи тиббии нав, аз ҷумла 97 объект барои ёрии тиббии аввалия, 9 бемористон ва 9 клиникаи хусусӣ сохта ва ба истифода дода шуд.

Вазири тандурустӣ гуфт, ки ҳаҷми сармоягузорӣ дар ин лоиҳаҳо 467, 8 миллион сомониро ташкил медиҳад. Таъкид шуд, корҳои сохтмонӣ дар 112 объект, аз ҷумла 71 муассиса барои ёрии тиббии аввалия, 33 бемористон ва 8 маркази тиббии хусусӣ идома дорад. Ҳамчунин, таъмири 366 муассисаи тандурустӣ бо маблағи 63,7 миллион сомонӣ анҷом дода шудааст ва дар 80 объекти дигар корҳои таъмиркунӣ идома дорад.

Ба объектҳои муҳимми тиббие, ки дар соли 2024 ифтитоҳ шуданд, метавон ба маркази тиббии бисёрфунксионалӣ дар ноҳияи Данғара, бемористонҳои марказӣ дар ноҳияи Ховалинг, Норак, шуъбаи таваллуд дар ноҳияи Ҷ. Балхӣ, инчунин, марказҳои хусусии “Микролаб” ва “Клиника 1+1” дар Хуҷанд ишора кард.

Вазири тандурустии Тоҷикистон дар нишасти матбуотӣ ба суол оид ба қатъи маблағгузориҳои ташкилоти кумаккунандаи амрикоӣ ЮСАИД (USAID) ишора намуда, афзуд, ки вазорат барои анҷоми лоиҳаҳо сармоягузорони нав меҷӯяд ва ҳатман маблағгузор пайдо хоҳад шуд.

Dialog.tj