Мақомоти Федератсияи Русия бар асоси дастури Владимир Путин, президенти ин кишвар, имсол дар шаҳри Маскав озмуни суруди “Интервидения” –ро бояд баргузор кунанд. Мусобиқаи овози “Интервидения” шабеҳи мусобиқаи овози “Евровидения" аст ва мақсади он эҳёи арзишҳои “суннатӣ” –и Русия мебошад. 

Бархе расонаҳо навиштанд, ки ҳадафи баргузории мусобиқаи овози “Интервидения” рақобат бо мусобиқаи овози “Евровидения” мебошад.

Баъди оғози ҷанги Русия бо Украина дар соли 2022 дастандаркорони мусобиқаи “Евровидения” ширкати намояндагони Русияро манъ карданд.

Дар пайи ин мамнуъият Владимир Путин дастури эҳёи мусобиқаи овози “Интервидения" - ро содир кардааст. “Интервидение” як барнома ё мусобиқаи суруд буд, ки беш аз 40 сол боз дигар дар Русия баргузор намешуд. Бархе таҳлилгарони рус, эҳёи “Интервидения” –ро бозгашт ба арзишҳои суннатии замони Шӯравӣ маънидод кардаанд.

Фармони баргузории мусобиқаи “Интервидение” рӯзи душанбе аз ҷониби Владимир Путин содир шуд, ки ҳадафаш “ҳамкориҳои фарҳангӣ ва инсонии байналмилалӣ” гуфта шудааст.

Таъкид шудааст, ки мусобиқаи нави овоз бояд ба “арзишҳои суннатӣ, ҷаҳонӣ, маънавӣ ва хонаводагӣ” пойбанд бошад. Ишораи ин нукта дар мусобиқаи “Интервидения” интиқоди ғайримустақим ба кори “Евровидения” аст, ки дар он гурӯҳе аз трансҷинсҳо ва ҳамҷинсгароҳо ширкат ва овозхонӣ карда буданд.

Dialog.tj