Алиҷон Салимзода, раиси Раёсати Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» дар нишасти матбуотӣ иттилоъ дод, ки бонки мазкур сиёсати қарздиҳии худро таҷдид намуда ва барои соҳаҳои афзалиятнок имтиёзҳо фароҳам оварда, меъёри фоизи қарзҳоро бо пули миллӣ аз 2 то 4 банди фоизӣ паст кард.

Дар нишаст афзуда шуд, ки соли 2024 аз ҳисоби захираҳои дохилию хориҷӣ ба зиёда аз 69 ҳазор мизоҷ 2,5 миллиард сомонӣ маблағҳои қарзӣ пешниҳод шуда, ин шумора нисбат ба соли 2023-юм 36 фоиз ва шумораи қарзгирон 31,3 фоиз зиёд гардидааст.

Тибқи иттилои масъулин қарзҳои додашуда ба соҳаҳои саноат 10,7 фоиз, кишоварзӣ 16,2 фоиз, истеъмолӣ 46,9 фоиз, сохтмон 10,3 фоиз, тиҷорат 15,1 фоиз, нақлиёт 0,2 фоиз ва хизматрасонӣ 0,6 фоиз рост меояд.

Иттилоъ дода шуд, ки бонки мазкур дар соли гузашта иқдоми қарзҳои имтиёзнокро таҳти унвони «Баҳор-2024», «Кишоварз», «Автоқарз», «Занҳои муваффақ», «Орзуҳои солинавӣ-2025» «Қарзҳои ипотекӣ» пешниҳод намудааст.

Дар ҳамин ҳол, гуфта шуд, ки сандуқи қарзии «Амонатбонк» ҳоло 3,1 миллиард сомонӣ ва шумораи қарзгирон аз рӯи бақия зиёда аз 75 ҳазор нафарро ташкил медиҳад, ки нисбат ба соли 2023 ҳаҷми сандуқи қарзӣ 42,5 фоиз ва шумораи қарзгирон аз рӯи бақия 22 фоиз афзудааст.

 Dialog.tj