Бинобар иттилои Сафаралӣ Қурбонзода, муовини якуми сардори Хадамоти зиддиинҳисории назди Ҳукумати Ҷумҳурии Тоҷикистон дар соли ҷорӣ эҳтимоли баланд шудани арзиши қувваи барқ вуҷуд дорад.

Тибқи иттилои дастрас, пешниҳоди баланд бардоштани арзиши қувваи барқ аз ҷониби “Барқи тоҷик” ба Хадамоти зиддинҳисорӣ ворид шудааст ва ин ниҳод пас аз баррасии масъала дар бобати баланд бардоштани арзиши тарифҳои истеҳсоли нерӯи барқ таклифҳоро пешниҳод кардааст. Илова бар ин, аллакай пешниҳоди мазкур аз ҷониби Вазорати энергетика ва захираҳои об ба Ҳукумати кишвар ирсол гардидааст.

Сафаралӣ Қурбонзода афзуд, ки дар мавриди баланд шудани нархи қувваи барқ дар ҳоли ҳозир қарори дахлдоре ба тасвиб нарасидааст ва чӣ қадар баланд шудани он ҳам маълум нест. Балки пас аз ҳисоб кардани хидматрасониҳои истеҳсол, интиқол ва тақсимоти барқ арзиши ниҳоӣ маълум мешавад.

То ҳол маълум нест, ки тарифҳо барои кадом қишри истифодабарандагони нерӯи барқ баланд карда мешаванд, аммо бояд гуфт, ки бори охир моҳи январи соли 2024 аз 26,51 дирам барои 1 киловатт-соат то 30,75 дирам баланд шуда буд.

Ҳамчунин, дар нишасти матбуотӣ масъулин иттилоъ доданд, ки соли 2024 аз ҷониби Хадамоти зиддиинҳисорӣ дар якчанд субъекти хоҷагидор санҷишҳои нақшавӣ ва ғайринақшавӣ гузаронида шуд, ки дар натиҷаи онҳо қонунвайронкунии зиддиинҳисорӣ ба маблағи 5 миллиону 400 ҳазор сомонӣ ошкор ва ба буҷети давлатӣ гузаронида шуд.

Dialog.tj