Директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Абдураҳмон Ҳалимзод зимни нишасти матбуотӣ иттилоъ дод, ки ҳоло дар ҷумҳурӣ шумораи умумии нафақагирон 836 ҳазору 690 касро ташкил дода, аз ин шумор 167 ҳазору 108 нафар нафақагирони маъюб мебошанд. Аз ҷумла, гурӯҳи якум — 17 965 нафар, гурӯҳи дуюм — 82 068 нафар, гурӯҳи сеюм — 33 041 нафар, маъюбони аз овони кӯдакӣ то 18-сола бошад, 34 034 кас мебошанд.

Инчунин, дар нишаст гуфта шуд, ки ҳоло шумори маъюбон ва иштирокчиёни Ҷанги дуюми ҷаҳон 21 нафар ва шумори иштирокчиён дар ақибгоҳ бошад, 140 нафарро ташкил медиҳад.

Иттилоъ дода шуд, ки андозаи нафақаи миёна дар кишвар 106,17 сомонӣ зиёд шуда, аз 368,9 сомонӣ ба 475,07 сомонӣ баробар гардидааст. Дар ҳамин давра, барои нафақагирон хизматрасонӣ дар ҳаҷми 26,5 миллион сомонӣ маблағгузорӣ карда шуд, ки нисбат ба соли 2023-юм 8,7 миллион сомонӣ ё 48,8 фоиз зиёд мебошад.

Ҳамчунин, гуфта шуд, ки дар ҷумҳурӣ аз пардохти нафақа қарздорӣ вуҷуд надорад.  

Dialog.tj