Дабири кулли Созмони аҳдномаи амнияти Дастаҷамъӣ ва роҳбари Кумитаи иҷроияи сохтори минтақавии зиддитеррористии Созмони ҳамкориҳои Шанхай дар мулоқоти дуҷониба дар хусуси густариши ҳамкориҳои фаъолона гуфтугӯ намуданд.

Роҳбарони ду созмони минтақавӣ дар ин мулоқот ба таҳкими ҳамкорӣ дар мубориза бар терроризм ва ифротгароӣ дар Осиёи Марказӣ ба тавофуқ расиданд.

Рӯзи 4-уми феврал Созмони аҳдномаи амнияти Дастаҷамъӣ иттилоъ дод, ки Имангали Тасмагамедов ва Орникбаев Шаршиев дар мулоқоти дуҷониба зуҳуроти ифротгароӣ ва мубориза бо терроризмро дар саҳти минтақаву ҷаҳон мавриди баррасӣ қарор доданд.

Онҳо таъкид карданд, ки иҷрои стратегияи ҳар ду созмон муҳим аст ва зарурати ҳамкории фаъолона бар зидди терроризм, ифротгароӣ ва маблағгузории ин соҳа ба вуҷуд омадааст.

Дар иттилоияи Созмони аҳдномаи амнияти Дастаҷамъӣ зикр мешавад, ки тақвияти ҳамоҳангӣ ва ҳамкорӣ бо Созмони ҳамкориҳои Шанхай барои суботи кишварҳои узв кумак мекунад.

Ҳафтаи гузашта дабири кулли СААД Имангали Тасмагамедов дар суҳбат бо ВАО таъкид карда буд, ки мубориза бо таҳдидҳои ифротгароӣ ва террористӣ ҷузъи асосии фаъолияти созмон дар кишварҳои Осиёи Марказӣ хоҳад буд. Ӯ зикр кард, ки таҳдидҳои амниятӣ аз дохили Афғонистон ҳанӯз вуҷуд дорад ва созмони мазкур иҷро намудани барномаи тақвияти марзи Тоҷикистон бо Афғонистонро дар соли 2025 оғоз мекунад.

Қобили зикр аст, ки Русия, Тоҷикистон, Арманистон, Беларусия, Қазоқистон, Қирғизистон аъзои доимии Созмони аҳдномаи амнияти Дастаҷамъӣ мебошанд.

Ҳафтаи гузашта дафтари минтақавии мубориза бо маводи мухаддири Созмони ҳамкориҳои Шанхай дар шаҳри Душанбе ифтитоҳ гардид. Дар ин нишаст таъкид шуд, ки бар зидди гардиши ғайриқонунии маводи мухаддир бояд мубориза бурд. Бархе сафирони кишварҳо узв, аз ҷумла сафари Эрон дар Тоҷикистон аз боз шудани дафтари созмони мазкур ҳимоят карда буд.

Аъзои Созмони ҳамкориҳои Шанхай 9 кишвар – Беларусия, Тоҷикистон, Арманистон, Русия, Қазоқистон, Қирғизистон, Ҳинд, Эрон ва Покистон мебошанд.

Dialog.tj