Рӯзи якшанбе дар маркази шаҳри Берлин ҳазорон нафар ҷамъ шуда, ба муқобили лоиҳаи пешниҳодкардаи мухолифини ҳукумати Олмон, ки қонунҳои муҳоҷиратро сахттар мекунад, эътироз намуданд.

Масъулияти иқдоми сахттар кардани қонунҳои муҳоҷиратро раҳбари консерваторони Иттифоқи масеҳиҳои демократ (ХДС) Фридрих Мертс бар уҳда дорад, ки ҳамчун номзади эҳтимолӣ барои мақоми конслерӣ дар интихоботи 23-уми феврали соли ҷорӣ муаррифӣ мешавад.

Лоиҳаи қонуни пешниҳоднамудаи мухолифон барои сахт кардани қонунҳои муҳоҷират аз ҷониби ҳизби ростгарои “Алтернатива барои Олмон”  пешниҳод шуд, ки ин як қадами нодир дар сиёсати суннатии Олмон аст.

Полиси шаҳри Берлин хабар дод, ки тақрибан 160 000 нафар дар наздикии дарвозаи Беранденбург, ки дар назди бинои Бундестаг қарор дорад, ҷамъ омаданд.

Бояд гуфт, ки лоиҳаи қонунҳои сахтгиронаи мухолифон ба парлумони Олмон пешниҳод шуд ва овоз нагирифт. Гурӯҳҳои ростгарои Олмон мухолифи ҳузури муҳоҷирони хориҷӣ дар Олмон ҳастанд. Онҳо, махсусан бар зидди мардуми Ховари Миёна ва Осиёи Марказӣ, ки умдатан мусалмонҳоянд, таблиғот мебаранд.

Dialog.tj