Намояндаи хоси президенти ИМА дар умури Украина гуфтааст, ки Доналд Трамп мехоҳад, дар Украина интихоботи президентӣ ва парлумонӣ баргузор шавад.

Тибқи иттилои расонаҳо, ИМА аз Украина талаб кардааст, ки вақти гузаронидани интихоботҳои президентӣ ва парлумониро муайян кунад ва агар оташбас миёни Русия ва Украина барқарор шавад, ин беҳтарин фурсат барои баргузории интихобот хоҳад буд.

Кит Келлог, намояндаи вижаи Иёлоти Муттаҳидаи Амрико дар корҳои Украина гуфтааст: “Бештари кишварҳои демократӣ дар замони ҷанг ҳам интихобот баргузор мекунанд. Фикр мекунам, муҳим аст, ки Украина ин корро анҷом диҳад”. Ӯ таъкид кардааст, ки баргузории интихобот дар ҳар шароите барои демократия муҳим аст.

Ҳафтаҳои ахир ВАО-и амрикоӣ аз эҳтимоли оғози оташбас ва қатъи ҷанг дар Украина ва Русия суҳбат мекунанд. Намояндаи президенти ИМА гуфтааст, ки Доналд Трамп ба Украина фишор меоварад, то барои қабул кардани шартҳои оташбас омода шавад. Ӯ гуфтааст, ки ҳам Украина ва ҳам Русия барои барқарор шудани оташбас ва қатъи ҷанг ниёз ба гузашт ва ақибнишинӣ аз баъзе мавқеъгириҳо доранд.

Dialog.tj