Сомонаи “Оксюз” ба нақл аз се манбаи худ, ки нахоста номашон ифшо шавад, хабар медиҳад, Исроил барои системаи дифоии Украина 90 мушаки раҳгир фиристодааст.

Расонаҳо хабар медиҳанд, пас аз он ки Исроил системаи “Патриот” –и худро аз рада хориҷ кард, Украина хостори ин мушакҳо шуд. Дар он замон Федератсияи Русия оид ба фиристодани системаи “Патриот” ба Исроил ҳушдор дода буд.

Рӯзҳои ахир чанд ҳавопаймои С-17 борбарии низомии Иёлоти Муттаҳидаи Амрико мушакҳоро аз пойгоҳҳои Исроил ба Лаҳистон интиқол доданд, ки минтақаи логистикии НАТО барои бо силоҳ муҷаҳҳаз кардани Украина аст. Мушакҳо аз тариқи Лаҳистон аллакай ба Украина интиқол ёфтааст.

Яке аз сухангӯёни сарвазири Исроил Бенямин Натаняҳу ба “Оксюз” гуфтааст, ки системаҳои “Пэтриот” ба Иёлоти Муттаҳидаи Амрико боз гардонида шуд: “Барои мо мушаххас нест, ки оё ин патриотҳо ба Украина таҳвил дода шудааст ё не”.

Намояндаи Федератсияи Русия дар Созмони Милали Муттаҳид дар моҳи январ ба Исроил ҳушдор дода буд, ки мусаллаҳ кардани Украина “оқибатҳои сиёсии хосе хоҳад дошт” ва “ҳар гуна силоҳе, ки ба ин кишвар ирсол шавад, нобуд хоҳад шуд”.