Шоми якуми феврал дар шаҳри Риёзи Арабистони Саудӣ мусобиқаи UFC Fight Night 250 доир гашт, ки варзишгари тоҷик Муҳаммад Наимов муҳорибаи панҷумашро дар ташкилоти мазкур гузаронд.

Муҳаммад Наимов дар доираи мусобиқаи UFC Fight Night 250 бо варзишгари австралӣ Каан Офли дар вазни нимсабук (то 66 кило) ба майдон баромада, бо қарори доварон ғалаба кард.

Муҳаммад Наимов дар ин муҳориба 81 ҳазор доллари амрикоӣ ба даст оварааст. Ҳамин тавр, 38 ҳазор доллар барои ба майдон баромадан, 38 ҳазор доллар барои ғолиб шудан ва 5 ҳазор доллар аз ҳисоби сарпарастон. Рақиби ӯ Каан Офли 24 ҳазор доллар кор кардааст.

Бояд гуфт, ки ин муҳорибаи панҷуми Муҳаммад Наимов дар ташиклоти UFC буд, ки аз ин шумора чор муҳориба дастболо ва дар якеаш шикаст хӯрдааст.

Ягона бохти ин варзишгари тоҷик дар UFC аз Фелипе Лимаи бразилӣ аст, ки 22-юми июни соли 2024 дар яке аз мусобиқаҳои ташкилоти мазкур доир гашта буд.

Муҳаммад Наимов 30 сол дорад ва аз соли 2018 дар муҳорибаҳои омехта баромад мекунад. Ӯ дар корномааш 15 муҳориба дошта, 12 ғалабаву 3 бохт дорад.

Ёдовар мешавем, ки то ҳол чор варзишгари тоҷик дар ташкилоти UFC баромад мекунанд.

Dialog.tj