Президенти Ҷумҳурии Беларусия дар нишасти хабарӣ дар вокуниш ба тамоюли ғарбгароии Арманистон таъкид кард, ки сарвазири ин кишвар Никол Пашинян бо тасмимҳои ҳамгиро бо Иттиҳоди Аврупо кишварашро нобуд хоҳад кард.

Александр Лукашенко ҳушдор дод, ки ғарбгароии сарвазири Арманистон Никол Пашинян бозии хатарнок аст ва бояд ӯро аз ин роҳ боз дошт.

Қаблан, Федератсияи Русия низ нисбат ба сиёсатҳои Арманистон барои фосила гирифтан аз ин кишвар ва наздик шудан ба Иттиҳоди Аврупо ҳушдор дода, таъкид кард, ки ин мавзуъ боиси сулҳ ва амният дар Қафқоз нахоҳад шуд.

Ҳукумати Арманистон ахиран эълон кард, ки Лоиҳаи пайвастан ба Иттиҳоди Аврупоро бо мақсади оғози музокироти узвияти ин кишвар бо ин Иттиҳод тасдиқ кардааст.

“Тасвиби қонун ба маънои пайвастани Арманистон ба Иттиҳоди Аврупо нест ва дар ин хусус бояд аз тариқи раъйспурсӣ тасмим гирифт” – таъкид кард сарвазири Арманистон.

Никол Пашинян чанде қабл бо Иёлоти Муттаҳидаи Амрико низ созишномаи ширикии стратегиро имзо кард.

Илҳом Алиев, президени Озарбойҷон чанде қабл гуфт, ки мусаллаҳ намудани Арманистон аз сӯйи кишварҳои аврупоӣ амнияти минтақаро таҳдид мекунад.

Арманистон пас аз шикаст дар ҷанги Қарабоғи Кӯҳӣ, ки бо пирӯзии Озарбойҷон анҷомид, рӯ ба Аврупо овард. Фаронса яке аз аъзои қудратманди Иттиҳоди Аврупо бо ҳимояти сиёсӣ ва низомӣ ба Арманистон кумак мекунад.

Раванди фосилагирии Арманистон аз блоки сиёсии зери назари Федератсияи Русия боиси интиқодҳои зиёде шудааст. Бархе аз коршиносон ин равандро барои Арманистон хатарнок тавсиф карда мегӯянд, ки такрори сарнавишти Гурҷистон ё Украина барои ин кишвар дур аз интизор нест.

Dialog.tj