Президенти Ҷумҳурии Ӯзбекистон Шавкат Мирзиёев ба мақомоти иҷроияи ҳукумат дастур дод, ки низоми додани қарзҳои ипотекӣ ба муҳоҷирони корӣ таҳия карда шавад. Дар ин хусус, воситаҳои ахбори Ӯзбекистон хабар доданд.

Президент пешниҳод кард, ки шаҳрвандони Ӯзбекистон, ки дар муҳоҷирати корӣ дар хориҷа қарор доранд, метавонанд қарзи ипотекӣ гиранд.

Дар маҷлиси рӯзи 23-уми январ Шавкат Мирзиёев таъкид кард, ки як сокини Ӯзбекистон, ҳатто бидуни ҷойи кори расмӣ, тибқи эъломияи даромад метавонад қарзи ипотекӣ гирад.

Қобили зикр аст, ки то кунун муҳоҷирони корӣ аз гирифтани чунин қарзҳои боимтиёз маҳрум буданд, зеро онҳо наметавонистанд санади тасдиқкунандаи даромади расмӣ дар кишвари худашонро пешниҳод намоянд.

Ба гуфтаи мақомоти ӯзбек, ипотека барои шаҳрвандоне, ки дар хориҷ кор мекунанд ва на камтар аз шаш моҳ мунтазам ба Ӯзбекистон пул интиқол медиҳанд, дода хоҳад шуд.

Пас аз оғози давраи раёсатҷумҳурии Шавкат Мирзиёев дар соли 2016 Ӯзбекистон ба пуштибонӣ ва кумакрасонии шаҳрвандоне, ки барои кор ба хориҷа мераванд, мунтазам чораандешӣ менамояд.

Барои муҳоҷирон замимаи мобилӣ сохта мешавад, ки бо ёрии он метавонанд дар хусуси ҷойҳои кории хориҷӣ маълумот гиранд, бо ҳамватанон ва созмонҳое, ки ба шаҳрвандони ба мушкилӣ рӯ ба рӯ шуда кумак мекунанд, тамос гиранд ва инчунин, интиқоли маблағро фароҳам оранд.

Dialog.tj