Дар минтақаи сарҳадии Исфара ва Бонканд сокинони Тоҷикистону Қирғизистон барои ободкориву тоза намудани минтақаи сарҳадӣ ҳашар ташкил намуданд.

Ҳашари тоҷикону қирғизҳо дар минтақаи “нейтралӣ” байни гузургоҳҳои сарҳадии Гулистони Исфараи Ҷумҳурии Тоҷикистон ва Қирғилбели ноҳияи Бондканди Ҷумҳурии Қирғизистон бо ташкил намудани оши дӯстӣ баргузор гардид.

Иқдоми мазкур бо роҳбарии Баҳоваддин Баҳодурзода, раиси ноҳияи Исфара ва Учқунбек Жоробоев, раиси ноҳияи Бонканд сурат гирифт.

Гуфта мешавад, ки сокинони ҳар ду кишвар таҳти раҳбарии раисони ноҳия корҳои тоза намудани минтақаи сарҳадиро анҷом доданд ва дар поёни кор ба иштирокчиён оши дӯстӣ ташкил карда шуд.

“Бори аввал баргузор шудани ҳашари дӯстонаи ҳамсояҳо ва нишастан сари дастархон баъди баста шудани марзи ду давлат далолат аз оғози ҳамгироии аҳолӣ мебошад, ки онро сарвари ду давлат: Пешвои миллат муҳтарам Эмомалӣ Раҳмон ва президенти ҳамосякишвар муҳтарам Содир Ҷабборов мудом таъкид менамоянд”- навиштаанд ВАО-и минтақавӣ.

Гуфта мешавад, ки дар минтақаи “нейтралӣ”-и мазкур корҳои ободониву кабудизоркунӣ гузаронида шуда, роҳҳи он пурра асфалтпӯш мешавад.

Ёдовар мешавем, Тоҷикистон ва Қирғизистон, ки бо ҳам баҳсҳои марзӣ доштанд, тайи чанд моҳи охир ба он нуқта гузоштанд. Дар мулоқоти охири раиси Кумитаи давлатии амнияти миллии Тоҷикистон Саймумин Ятимов ва раиси Кумитаи амнияти Қирғизистон Қамчибек Ташиев санаде имзо шуд, ки бар асоси он хатҳои баҳсбарангези марзӣ ҳал шуда, масъалаи аломатгузорӣ ва иҷрои созишнома пешниҳод гардид.

Dialog.tj