Вазорати кишоварзии Ӯзбекистон дар хусуси захираҳои картошка ва тадбири тақсимоти он ба минтақаҳо хабар дод.

Дар пасманзари гузоришҳо дар хусуси боло рафтани нархи картошка Вазорат таъкид кард, ки ҷадвали тақсимот барои истеъмолгарони дохилӣ тасдиқ шуд ва беш аз 239 ҳазор тонна сабзаҷот дар захирагоҳ нигоҳ дошта мешавад.

Вазорати кишоварзии Ӯзбекистон ба хабарҳое вокуниш нишон дод, ки маҳдудиятҳои содироти картошка аз Қазоқистон метавонад боиси афзоиши қобили мулоҳизаи нархи картошка дар бозорҳои Ӯзбекистон шавад.

Тибқи иттилоъи мақомоти дахлдори Ӯзбекистон ниёзи солонаи ин кишвар ба картошка 4 миллион тоннаро ташкил медиҳад.

Бар асоси иттилои мақомот, дар соли 2024 3, 7 миллион тонна картошка истеҳсол шуд, ки 2,7 миллион тоннаи он дар майдонҳои кишти асосӣ ва 1 миллион тоннааш бо кишти такрорӣ ба даст омад. Гуфта мешавад, ки 600 ҳазор тоннаи ҳосили бадастомада ҳамчун маводи захиравии тухмӣ барои кишти соли оянда нигоҳ дошта мешавад.

Мақомот дар мавсими соли 2024-2025 тадбирҳои мушаххас андешида 245, 5 ҳазор тонна картошка барои захира ҷамъоварӣ намуданд.

Таъкид мегардад, ки то 10-уми январи соли ҷорӣ 6,3 ҳазор тонна картошка барои фурӯши бозорҳои дохилӣ бароварда шудааст. Захираи боқимонда 239, 2 ҳазор тоннаро ташкил медиҳад.

Бар асоси иттилои ВАО Вазорати иқтисод ва молияи Ҷумҳурии Ӯзбекистон барои таъминоти дохилӣ ҷадвали 10-рӯзаи таъминотро аз рӯи минтақаҳо тасдиқ намудааст.

Dialog.tj