Баъзе аз асирони фаластинӣ, ки дар чорчӯби табодули асирони исроилӣ озод шуданд, ривояти ваҳшатноки зиндонҳои Исроилро ривоят карданд. Онҳо гуфтаанд, ки аз ҳама имконоти аввалияи тиббӣ маҳрум буданд ва ҳамеша мавриди шиканҷа ва фишори рӯҳии маъмурони зиндон қарор мегирифтанд.

Одам Ҳудра, аз ҷумлаи зани зиндонии озодшуда аз зиндони Исроил аст, ки дар марҳилаи аввали табодули зиндониён озод гардид. Ӯ дар суҳбат ба шабакаи телевизионии “Ал-Ҷазира” мегӯяд: “Исроил аз пеши хонаам маро боздошт кард, давраи зиндон бисёр сахту душвор буд. Ман ва дигар зиндониён, ки баъзеи онҳо солхӯрда буданд, дар зиндон мавриди шиканҷа ва бетаваҷҷуҳӣ қарор мегирифтем, аз доруву дармон маҳрум будем”.

Зани озодшудаи дигари фаластинӣ Шио Умар низ ба шабакаи “Ал-Ҷазира” гуфт: “Шаш моҳ дар зиндони режими Исроил зиндонӣ будам ва ҳанӯз муддати маҳкумиятам мушаххас нашудааст. Имрӯз фақат бовар кардам, ки ман ҷузви аввалин асирони озодшуда ҳастам”.

Само Ҳаҷовӣ, зани зиндонии дигар, ки озод гардидааст, мегӯяд: “Дуюмин бор ба зиндони Исроил даромадам ва дар ин муддат шиканҷа ва зулмҳои зиёде дидам. Теъдоди зиёде аз зиндониёни зан дар муддати зиндон вазъияти бисёр душвор доштанд, зеро бархе бемор буданд, имконоти тиббӣ надоштем”.

Хоҳари Руло Ҳусайн, як хабарнигори зани фаластинии озодшуда низ ба шабакаи “Ал-Ҷазира” гуфтааст: “Хоҳари ман дар вазъияти бисёр сахт қарор дорад ва баъд аз озодӣ бояд барои дармон ба бемористон равад. Хоҳари ман дар зиндон аз набудани имкониятҳои тиббӣ ранҷ бурд ва ин амр ба саломатиаш таъсир гузоштааст”.

Бушрӣ Ал-Тавил низ хабарнигори дигари зани зиндониест, ки дар марҳилаи аввали тавофуқ озод гардидааст. Ӯ субҳи имрӯз вориди манзилаш дар минтақаи Ал-Байра, дар наздикии шаҳри Ромуллоҳ дар Канораи Бохтарии рӯди Урдун шуд. Вай афзуд, ки дар зиндон мавриди хушунати физикии масъулони зиндон қарор гирифт.

Қобили ёдоварӣ аст, ки аввалин гурӯҳи зиндониёни фаластинӣ, шомили 90 нафар, субҳи рӯзи якшанбе дар чорчӯби табодули асирон аз зиндони Исроил озод шуданд. Ҳамос дар муқобили 90 фаластинии озодшуда, 3 зиндонии исроилиро озод кард.

Dialog.tj