Башор Асад ва хонаводааш пас аз поёни ҳукумати 25-сола аз Сурия ба шаҳри Маскави Федератсияи Русия рафтаанд. Дар ин хусус ВАО –и русӣ хабар медиҳанд.

Шабакаи телевизиони расмии Русия ба қавл аз мақомоти расмии ин кишвар хабар дод, ки Русия ба Башор Асад ва хонаводааш ба далелҳои башардӯстона ҳуқуқи паноҳандагӣ дод. 

Қабл аз тасдиқи ҳузури Башор Асад дар Русия дар бораи ӯ хабарҳои мухталиф нашр шуд. Бархе ВАО таъкид намуда буданд, ки ӯ ба Имороти Муттаҳидаи Арабӣ рафтааст. Иттилои дигар дар мавриди фирори ӯ ба Эрон низ нашр шуд. “Рейтерз” дар бораи суқути ҳавопаймои ӯ ва кушта шуданаш бо такя ба манбаъҳояш хабар нашр кард. Вале дар ниҳоят маълум шуд, ки Башор Асад шаби шанбе бо як ҳавопаймо аз Сурия хориҷ шуда, ба Федератсияи Русия рафтааст.

Михаил Улянов, намояндаи Русия дар Созмони Милали Муттаҳид хабари ворид шудани Башор Асад ба Русияро тасдиқ кард.

“Русия дар шароити сахт ба дӯстони худ хиёнат намекунад. Ин тафовут байни Русия ва Амрико аст” – гуфтааст Михаил Улянов.

Dialog.tj