Дар даҳ соли охир ҳосили истеҳсоли гандум дар Ҷумҳурии Қазоқистон рекордӣ шуд. Дар робита ба ин Ҳукумати ин кишвар ба ниҳодҳои дахлдор дастур додааст, ки бозори фурӯши гандуми Қазоқистонро густариш диҳанд.

Тибқи иттилои Вазорати кишоварзии Қазоқистон ҳосили гандум имсол 26, 7 миллион тоннаро ташкил додааст. Дар соли 2023 ин рақам 17, 1 миллион тонна, дар соли 2022 22, 03 миллион тонна ва дар соли 2021 ҳосили гандум 16, 3 миллион тоннаро ташкил дода буд.

Дар маҷлиси Ҳукумат бо сарварии сарвазири Қазоқистон масъалаи густариши бозорҳои фурӯши гандуми ин кишвар баррасӣ гардид. Пешниҳод шуд, ки бозори фурӯш дар Ховари Миёна, Африқои Шимолӣ, Осиёи Миёна, Шарқи Наздик ва Иттиҳоди Аврупо ба роҳ монда шавад.

Дар ин маҷлис муовини вазири савдои Қазоқистон самтҳои афзалиятноки бозори фурӯши гандумро зикр кард, ки инҳо мебошанд: Чин, Осиёи Марказӣ, Туркия, Афғонистон, Шарқи Наздик, Италия, Латвия ва Испания.

Бар асоси иттилои Вазорати савдои Қазоқистон иқтидори содиротии ин кишвар дар соли ҷорӣ 12 миллион тоннаро ташкил медиҳад.

Қосим-Жомарт Токаев дар Анҷумани аввалини кишоварзон гуфт, ки Қазоқистон бояд на танҳо бозорҳои анъанавии фурӯшро нигоҳ дорад, балки содиротро диверсификатсия намуда, схемаи тағйири таъминотро ба талаботи кишварҳои мухталиф мутобиқ созад.

Имсол содироти гандум аллакай ба Ӯзбекистон ва Туркманистон оғоз шудааст. Содирот ба бозори Эрон низ оғоз шуд ва аллакай 250 ҳазор тонна ҷав интиқол дода шуд.

Дар ҳамин ҳол президенти Қазоқистон таъкид кардааст, ки гандум бояд ба бозорҳои Чин, кишварҳои узви Иттиҳоди Аврупо, Шарқи Наздик, Ховари Миёна ва Африқои Шимолӣ интиқол дода шавад.

Барои амалӣ намудани стратегияи фурӯши гандум зиёд намудани нақлиёти баҳрӣ ба нақша гирифта шуда, дар бандари Курик терминали нави гандум ба кор даромад. Таъкид мешавад, ки дар робита ба ин нақши долонҳои байналмилалӣ, монанди роҳи Шимол-Ҷануб ва Транс-Каспӣ муҳим аст.

Dialog.tj