Вазорати корҳои хориҷаи Чин бо нашри эъломия ҳамлаи мусаллаҳона ба шаҳрвандонаш дар сарҳади Тоҷикистонро, ки як нафар кушта шуд, маҳкум намуда, аз Ҳукумати Ҷумҳурии Тоҷикистон хост, дар ин хусус таҳқиқи мунсифона анҷом диҳад.

Рӯзи 18-уми ноябр ҳамлаи мусаллаҳона аз он сӯйи марзи Афғонистон аз ҷониби шахсони мусаллаҳ ба як қароргоҳи корхонаи чинӣ дар дараи Зарбузи ноҳияи Шамсиддини Шоҳин сурат гирифт. Дар натиҷаи ин ҳамла як шаҳрванди Чин кушта ва панҷ нафари дигар захмӣ шуданд.

Тибқи эъломияи Вазорати корҳои хориҷаи Чин ҳамлаи мусаллаҳона ба як қароргоҳи корхонаи чинӣ дар сарҳади Тоҷикистону Афғонистон аз он сӯйи марз сурат гирифтааст. Дар натиҷаи он, аз ҷумла як сокини маҳаллӣ низ захмӣ шудааст.

Вазорати корҳои хориҷии Чин ҳамлаи мусаллаҳонаи мазкурро“хушунатомез” тавсиф намуда, маҳкум кард ва аз шаҳрвандонаш хост, ки дар вақти кор дар сарҳади Тоҷикистону Афғонистон аз эҳтиёт кор гирифта, чораҳои амниятиро риоя кунанд.

Мақомоти Тоҷикистон ҳанӯз ҳодисаи ҳамлаи мусаллаҳона ба як қароргоҳи корхонаи чинӣ дар дараи Зарбузи ноҳияи Шамсиддини Шоҳинро, ки ба фаъолиятҳои иктишофии тило машғул буд, шарҳ надодаанд.

Dialog.tj