Расонаҳои Қирғизистон менависанд, ки хабари гузоштани бомб (моддаи тарканда) дар Академияи тиббии Қирғизистон донишҷӯён ва кормандони онро нигарон кард. Гуфта мешавад, мақомоти қудратии ин кишвар дар пайи амали мазкур тамоми биноро аз афрод холӣ намуданд.

Полиси Қирғизистон рӯзи 18-уми октябр соати 11:00 хабари гузоштани як бомб дар дохили Академияи тиббии Қирғизистонро дарёфт кард. Кормандони полис баъди дарёфти хабар вориди Академияи мазкур шуда, кормандон ва донишҷӯёнро аз он хориҷ намуданд. Дар натиҷа Академияи тиббии Қирғизистон ва атрофи он бо истифода аз сагҳое, ки бомбро кашф мекунанд, ҷустуҷӯ шуданд.

Аммо то ҳанӯз вуҷуд доштани бомб дар муассисаи мазкур аз тарафи мақомоти қудратӣ ва расмии кишвари Қирғизистон тасдиқ нашудааст.

Ёдовар бояд шуд, ки ҳафтае қабл як гурӯҳ дар Қирғизистон ба иттиҳоми ташкили табаддулоти давлатӣ боздошт шуданд. Дар қатори гурӯҳи боздоштшуда низомиён ва кормандони ҳифзи ҳуқуқи ин кишвар ҳузур доштанд. Тайи як ҳафтаи охир ду ҳодисае дар Қирғизистон рух дод, ки боиси сарусадои зиёд гардид.

Dialog.tj