Илҳом Алиев, президенти Озарбойҷон, Қосим – Жомарт Токаев, президенти Қазоқистон ва Шавкат Мирзиёев, президенти Узбекистон дар ҳошияи Иҷлосияи умумии Конфронси 29-уми ҷонибҳои Конвенсияи қолабии СММ оид ба тағйирёбии иқлим дар шаҳри Боку дидор ва мулоқот намуда, масъалаи рушд ва интиқоли “энергияи сабз” –ро мавриди баррасӣ қарор доданд.

Тибқи иттилои Дафтари матбуоти президенти Озарбойҷон се ҷониб дар поёни нишаст тафоҳумномаеро имзо карданд, ки бар асоси он барномаи рушд ва интиқоли “энергия сабз” амалӣ карда мешавад.

Ҳикмат Ҳоҷиев, муовини президенти Озарбойҷон дар шабакаи “Х” роҷеъ ба тафоҳумномаи мазкур навишт, ки энергияи сабзи ин се кишвар аз тариқи Баҳри Хазар интиқол меёбад ва ба тарҳи Кобулэнергияи Баҳри Сиёҳ васл хоҳад шуд.

Дар моҳи июни имсол мақомотҳои озарбойҷонӣ иттилоъ дода буданд, ки се кишвар – Озарбойҷон, Узбекистон ва Қазоқистон бо ҳадафи ҳамкорӣ дар бахши энергетика, аз ҷумла энергияи сабз дар моҳҳои оянда тафоҳумномае дар бораи ҳамкории стратегӣ барои баҳрабардорӣ имзо хоҳанд кард.

Тибқи тафоҳумномаи мазкур ин се кишвар дар ҳоли иҷрои тарҳҳои муштарак дар интиқол ва таъмини барқи тавлидшуда аз сарчашмаҳои таҷдидпазир ҳастанд ва мақсади онҳо рушди энергияи сабз ва интиқоли он хоҳад буд.

Dialog.tj