Нависанда ва пажӯҳишгари маъруфи тоҷик Мирзо Шукурзода дар пайи бемории тулонӣ дар синни 75-солагӣ аз дунë даргузашт.

Мирзо Шукурзода имсол ба дарëфти унвони баланди "Нависандаи халқии Тоҷикистон" шарафëб гардида, қаблан барои китоби "Ҷонпайванд" барандаи ҷоизаи адабии ба номи Садриддин Айнӣ шуда буд.
Мирзо Шукурзода  соли 1949 дар деҳаи Худгифи Сояи ноҳияи Кӯҳистони Мастчоҳ ба ҷаҳон омада, соли 1966 мактаби миёнаи зодгоҳаш ва соли 1973 бахши рӯзноманигории факултаи филологияи тоҷики Донишгоҳи давлатии Тоҷикистонро хатм карда буд.
Бояд гуфт, ки Шукурзода дувоздаҳ сол дар Ҷумҳурии Исломии Эрон (1992—2004) фаъолияти фарҳангӣ ва ду сол дар Афғонистон (1985—1987) ба ҳайси тарҷумон хидмат намуда буд. Ҳамчунин солҳо ба ҳайси мудири шуъбаи насри Иттифоқи нависандагон ва маҷаллаи "Садои Шарқ" фаъолият доштааст.
Ӯ  дар Кобул ва Теҳрону Душанбе ва Пешовари Покистон беш аз 20 китоби илмӣ ва пажӯҳишӣ ба чоп расондааст, ки маъруфтарини онҳо «Тоҷикон дар масири таърих» аст, ки борҳо дар Эрону Афғонистону Тоҷикистон мунташир шудааст.
Китоби «Тоҷикон дар қаламрави Ориёно»-и Шукурзодаро соли 2007 ҳафтавори «Варорӯд» «Китоби беҳтарини сол» эълом карда буд.

Бояд гуфт, ки таълифоти нависанда дар бораи фоҷеаи  Афғонистон низ бисëр арзишманд аст.

Dialog.TJ