Мақомҳои Ҳукумати Толибон (ҳаракати террористӣ) қарордоди ҷустуҷӯ ва коркарди гази Тути майдони вилояти Форёби Афғонистонро бо арзиши як миллиард доллар бо як ширкати узбекистонӣ имзо карданд. Ширкати узбекистонии “Эриал компания ” масъулияти иктишоф ва коркарди майдони газии Тути майдони Форёбро бар уҳда гирифта, қарор аст, дар ибтидои кор 1000 миллион доллар ба ин тарҳ сармоягузорӣ кунад.

Мақомоти Толибон гуфтаанд, ки майдони гази Тути майдони Форёб дорои наздики 7000 километри мураббаъ масоҳат буда, муҳлати қарордоди имзошуда 25 солро дар бар мегирад. Ҳомюн Афғон сухангӯйи Вазорати маъдан ва саноати Толибон гуфтааст, ки ширкати узбекистонии “Эриал компания” барандаи қарордод шуда ва ин ширкат қарор аст, ки миллионҳо доллар дар ин бахш сармоягузорӣ кунад: “Ин ширкат дар ҷараёни як сол ба маблағи 100 миллион доллар барои истихроҷи гази ин минтақа сармоягузорӣ хоҳад кард ва ҳамчунин, вазифадор аст, то дар ду соли оянда аз гази истихроҷшуда беш аз 100 мегават барқ тавлид кунад”.

Ҳукумати Толибон, ки аз сӯйи ҷомеаи байналмилалӣ ба расмият шинохта нашудааст, то ин дам бо ширкатҳои чинӣ, туркӣ, узбекистонӣ даҳҳо қарордод ба арзиши садҳо миллион доллар имзо кардааст. Фаъолони ҷомеаи шаҳрвандии Афғонистон аз бастани қарордодҳои Толибон норозиянд ва мегӯянд, ки гурӯҳи мазкур дар фаъолияти худ шаффофият нишон намедиҳад ва фасод дар фаъолиятҳои иқтисодии гурӯҳи мазкур бисёр дида мешавад.